الثلاثاء، 12 أبريل 2022

  العقارات فى مصر

البحث عن عقار مناسب

لو بتشترى – بتأجر اى عقار .. يبقى لازم تعرف تبحث عنه ازاى ؟؟
وعشان تقدر تلاقى نتيجة لبحثك المنشود عن افضل العروض.
هتسأل نفسك سؤال مهم :-
انا عاوز اشترى/ ااجر .. ايه ؟ وفين ؟ وليه ؟ وازاى؟ وبكم ؟
واجاباتك هتحددها بنفسك حسب طبيعة اختيارتك ..


* ايه ؟
يعنى نوع الوحدة العقارية إللى انت محتاجها .. وهتلاقى ان المسميات كتيرة جدآ لانواع الوحدات العقارية / شقة – فيلا – ارض – شاليه – مصنع – محل – صيدليه .. الخ
وفى النهاية انت اللى هتحدد (تصنيف) نوع الوحدة من كونها مخصصة سكنى / ادارى / تجارى (حسب نوع الترخيص) اللى هتختاره طبقآ للمعطيات التالية:-
* نوع المبنى/ مبنى قديم – تحت الانشاء - مشروع جديد – مدن جديدة – استلام فورى – اهالى – ق.مسلحة – نقابات – اوقاف – شركات – مقاول .
* طبيعة المشروع/ مشاريع اسكان محدودى الدخل/ متوسط / استثمارى/ فاخر ؟  


* فين ؟
يعنى (المكان) اللى هتشترى/ هتأجر فيه عقارك حسب ظروفك واحتياجك ( المحافظة / المدينة / الحى / المنطقة) اللى هتختار فيه مكان وحدتك.
ولما تقول فين كمكان يبقى اختيارك مرتبط بـــ اختيار (( نوع المبنى )) اللى يتناسب مع امكانياتك وطريقة شراءك للوحدة اللى انت محتاجها .. وهنا هنلاقى معايير الاختيار كبيرة ونسبية للمشترى حسب رؤيته وامكانياته والزوق العام والثقافة المجتمعية اللى بتصنف المشترى ونوع الفئة المجتمعية 


 مثال بسيط/ فى ناس بتفضل المبانى القديمة عن الجديدة عشان البراح فى المناور الهوائية والمساحات والمواقع وعدد الادوار و العديد من مميزاتها اللى مش لاقيها فى الجديدة .. وفى ناس عاوزة مجتمعات عمرانية جديدة وبعيدة عن الاذدحام والتكدس والمساحات الخضراء والخدمات اللى مش موجود فى القديمة واهمها الجراجات وودائع الصيانة وغيره من المميزات .. عشان كده هنلاقى نسبية كبيرة فى الاختيارات لنوع المبنى حسب حاجات كتير من وجهة نظر المشترى.


* ليه ؟
يعنى الغرض من الشراء / الايجار .. ؟؟
وبحسب (نسبية) الغرض من الشراء سواء كان (سكن / استثمار) :-
* لو هتشترى/ هتأجر وهتسكن فيه يبقى لازم تختار حاجة قريبة من مكان شغلك/ دراسة اولادك الان او فيما بعد لانه هيكون موطنك اللى مش هتغيره كل يوم .. وتبدله لمجرد انك حصلت على الافضل .
* لو هتستثمره (باعتبار ان العقار هو افضل استثمار) يبقى هتوسع دوائر اختياراتك ما بين افكار الاستثمار (قصير/ طويل) المدى :-
- (قصير المدى) لو انت فرد عادى او تاجر وعاوز يكسب اول ما يدفع فلوسه عشان تحس بقيمة استثمارك وعائد الربح من دوران ربحية رأسمالك بديلآ عن وضع فلوسك فى البنك .. وهنا هتختار ما بين عقار مستعمل ولقطة حسب ظروف البائع او حاجة جديدة استلامها فورى وبتسهيلات مميزة هتقدر بعد ما تشتريها وتستلمها يا تأجرها وتنتفع بالعائد بتاعها او هتعيد بيعها تانى بعد ما تعمل شوية تحسينات عليها حسب مقتضيات العرض والطلب فى السوق.
- (طويل المدى) باعتبارك تاجر – فرد عادى بدل ما بيركن فلوسه فى البنك هيحطها فى حاجة بالقسط وقادر على سداد ثمنها من مصادر اخرى فى الاخر اختيارك هيكون مع المشروعات الجديدة وتحديدآ تحت الانشاء اللى اسعارها ممكن تتناسب مع ظروف سدادك لاى وحدة سواء كانت (سكنى/ تجارى/ ادارى) وبحسب مميزات كل مشروع وسمعة المطور العقارى وتراخيص البناء الرسمية ومدد الاستلام ودعايته اللى هتعود عليك بعد كده بقيمة مضافة للمكان دعائيآ/ اعلانيآ فى الميديا.

 * ازاى ؟
يعنى حضرتك هتسأل بنفسك فى المواقع الميدانية بالطرق الاعتيادية / ولا هتوفر وقتك وتسال جوجل ومواقع الانترنت والسوشيال ميديا وتبدأ رحلة بحثك عبر الانترنت للحصول على مرادك / ولا هتوفر جهدك ووقتك وفلوسك وتبدأ تبحث عن شركة تسويق معتمدة ومرخصة ولها سمعة حسنة زى / الدولية للتسويق والاستشارات العقارية وتلجأ لها وتعمل تفويض بالمعاملة محدد الوقت وتحصل على الخدمة المطلوبة فى اقل وقت ممكن مقابل رسوم الخدمة بعد ما تحرر عقودك وتحصل على حالة من الرضا التام فى التعامل.

 
* بكم ؟

يعنى امكانياتك المادية للشراء/ الايجار تسمح بسداد ثمنه منين وازاى ؟
- لو هتاجر وحدة عقارية هتلاقى معروض كتير من الوحدات العقارية اللى التعاقد عليها بيكون مقنن ببعض المحددات زى/ القيمة والمدة والغرض من الاستخدام للوحدة.
- ولو هتشترى .. يبقى قرار الشراء حسب ظروفك المادية التى تتناسب مع احتياجاتك/ رغباتك  للعروض المتاحة سواء كان استلام فورى – مؤجل وطبقآ لسعر كاش او بتسهيلات او بتمويل بنكى بقروض/ رهن عقارى.
وهنا ننفرد بامكانية تنوع مصادر التمويل من عدة بنوك لاعتماد فكرة التمويل على قدرة توفيق الشركة لامكانات العميل ماديآ + توافر الوحدات المتاحة للتعامل بنظم التمويل المتعارف عليها من خلال انشاء محفظة للعميل الراغب وتسهيل طرق اعتماد التمويل من البنوك فى وقت وجيز وبدون مجهود لحين عرض ما هو متاح من وحدات قابلة للتعامل بنظم التمول المتعددة.

** واثناء رحلة البحث دى وقبل ما تحرر عقدك .. هتلاقى نفسك بتسأل سؤال بديهى/ ايه هى القيمة الفعلية للمكان ده فى السوق العقارى الان .. وبكرة؟


وده سؤال منطقى وطبيعى لان السوق العقارى المصرى للاسف سوق عشوائى مفيش فيه اى محددات ملموسة لفكرة التسعير والتقييم لاى وحدة عقارية وده نابع من عدم وجود قواعد بيانات حقيقية للعقارات وايضآ لرغبات طرفى التعامل فى الحصول على اعلى سعر مقابل عند البيع ويقابله رغبة المشترى فى الوصول لاقل سعر معروض .. والتباين ده هتلاقيه فى كل مراحل البحث عند السؤال عن السعر العادل اللى بيمثل لك كطرف فى عملية التعاقد حالة من حالات الرضا والقناعة من كون السعر عادل/ مغالى فيه .

** عشان كده/ الدولية للتسويق والاستشارات العقارية .. بتقدم لعملائها خدمة التقييم العقارى (المجانى) .. يعنى قبل ما تتعاقد على وحدة عقارية هتعرف من خلالها القيمة السوقية للعقار ده النهاردة = كم .. وبكرة ممكن يبقى بكم.


** وبكده ممكن نكون غطينا اهم اوجه رحلة البحث للحصول على وحدة عقارية مميزة فى السوق العقارى المصرى بكل شفافية للخطوات المفترض اتخاذها ومن خلال رصيد الثقة المتاح لدينا وكم خبرات التعامل فى السوق العقارى ودقة البيانات/ الاستشارات الممنوحة للعملاء فى السوق.
لمزيد من الاستفسارات والمعلومات يرجى التواصل بخدمة العملاء على الارقام التالية/ 01141046020 / 01000173732 / 01225523441
او مراسلتنا على البريد الاليكترونى/
reclubtoday@gmail.com
ايضآ امكانية الاتصال عبر العديد من تطبيقات التواصل لتلك الارقام.   


  






الخميس، 11 يونيو 2020

نصائح قانونية عند التعاقد على اى وحدة عقارية


خلى النصائح دى فى بالك وانت بتتعاقد على بيع/ايجار/مشاركه/اتفاق اى وحدة عقارية.

١ - العقد مش حيكون باطل لو مافيش شهود ماضين عليه المهم توقيع الشخص الى باع/ اجر لك مش الشهود.
٢ - العقد لازم يتكتب فيه تاريخ ماينفعش يكون فاضى وحضرتك تقول نبقى نكتب التاريخ براحتنا بعد كده.
٣ - مافيش حاجه اسمها خالص الثمن حضرتك بتكتب فى العقد أن قيمة الشيء المبيع كذا ارقام/ حروف ومتفقط وتم سداد كامل الثمن بمجلس العقد ماينفعش تقولى اكتب خالص الثمن حضرتك مش بتشترى من كارفور ده عقد وله بنود وشروط . لان ببساطة من الممكن اى طرف يطعن فى اى اضافة اخرى والطب الشرعى هيثبت ده لك او عليك ويبقى تزوير وغش وغبن وتدليس وقصص ملهاش اى لازمة.
٤ - ياريت حضرتك سواء بائع أو مشترى تمضى على كل ورقه ياريت ماتستسهلش وتكسل .. لان توقيعك اسفل كل ورقة قرينة وبيقفل باب الاضافات اللى ممكن تكون مش فى صالحك.
٥ - فى فرق بين صحه التوقيع والتسجيل ومش كل العقود ينفع تتسجل فى الشهر العقارى ومش معنى أن العقد عليه ختم صحه توقيع/ محكمة يبقى اتسجل.
٦ - مافيش حاجه اسمها تنازل على ظهر العقد ويبقى كده اشتريت ... اشتريت يعنى اعمل عقد بيع وشراء منفصل واذكر فيه التنازل.
٧ - ياريت لما حضرتك تشترى شقه أو تأجر تاخد آخر إيصالات مياه وكهرباء وغاز علشان لو المشترى باعلك مش حتشوف وشه تانى وغصب عنك حتدفعهم ده غير بيانات تغيير العدادات لو حبيت تعملها بعد كده.
٨ - صحه التوقيع مهمه وبتثبت تاريخ البيع وتوقيع البائع والمشترى ماتعملش ناصح وتقول مالهاش لازمه علشان ماترجعش تعيط بعد كده وعلى فكره ينفع المشترى يرفع صحه توقيع على البائع وكمان ينفع البائع يرفع صحه توقيع على المشترى مافيهاش حاجه كل واحد يضمن حقه .
٩ - لو حضرتك اشتريت شقه تمليك ومالكش حصه فى الارض والبيت وقع كده حضرتك مالكش اى حاجه يعنى حضرتك اشتريت حيطان بس.
١٠ - لو اشتريت شقه من واحد والشخص ده اتوفى بعد مابعلك من حقك ترفع صحه توقيع على ورثته عادى
١١ - عقد الإيجار ممكن يتعمل عليه صحه توقيع لو مدة الإيجار اكتر من ٩ سنوات ولو أقل من كده يبقى إثبات تاريخ.
١٢ - ياريت قبل ماتشترى شقه من حد متزوج تسأل هل صدرلها قرار تمكين ولا لا علشان لو زوجة البائع كانت عامله قرار تمكين للشقه قبل مايبعها يبقى عليه العوض ومنه العوض
١٣ - ياريت لما تشترى شقه ويكون عليها أقساط تعمل العقد من ٣ نسخ البائع ياخد نسخه والمشترى ياخد نسختين علشان لما حضرتك ترفع صحه توقيع للعقد المحكمه لازم يكون قدامها أصل العقد وطبعا المحامى مش حيقدر يسحب الأصل غير لما القضيه تخلص ...
١٤ - على فكره عادى جدا انك ترفع دعوى صحه توقيع على عقد ابتدائى أو عقد لسه عليه أقساط. .
** اهم نصيحة لازم يكون معاك اومعاكي محامي فاهم للاطلاع علي الاوارق والتأكد من صحتها وتسلسل / وايلولة ومستندات الملكية ثم صياغة بنود العقد بما يضمن كافة حقوقك فيما بعد واستلام كل لاصول والاوراق الخاصة بالمكان المباع من البائع والاخير بيحتفظ بصور ضوئية فقط من الاوراق.
================
لو محتاجنا معاك فى اى وقت تحت امرك
فقط يمكنك التواصل بنا على اى من الارقام التالية
01000173732 / 01141046020 / 01225523441
فون+ واتس من 10 ص حتى 7 مساء يوميآ عدا الجمعة من كل اسبوع مع تحيات/ الدولية للتسويق والاستشارات العقارية
بالتوفيق للجميع

الأحد، 5 يناير 2020

معلومات مهمة قبل ما تشترى اى شقة

نصائح ومعلومات مهمة قبل شراء اى شقة

العقار افضل استثمار .. يعنى هتشترى وتبيع عشان تستثمر فلوسك افضل من فائدة البنك .. وعشان تشترى اى عقار وانت مطمئن لازم تتعرف على اهم النصائح التالية من واقع خبرات العمل بالسوق العقارى .. واللى بتقدمها لك/ المؤسسة الدولية للتسويق والاستشارات العقارية .. باعتبارها شركة تقييم وتسويق وادارة املاك عقارية.


** لو بتشترى شقة لازم تتعرف على معلومات ونصائح مهمة 


١- كلمه مترخصه ما بقاش ليها لازمه دلوقتى .. لان بعد تطبيق سريان قانون التصالح هيكون العقار اما مرخص رسمى او مخالف .. وده تقدر تعرفه من مشوار بسيط للحى التابع له مكان العقار اللى فيه الشقة / العقار/ الارض اللى عاوز تشتريها .. هتدخل على المركز التكنولوجى لخدمة المواطنين .. وعلى شباك الفحص / التراخيص هتدى له رقم العقار وتقول له اكشف لى عن الرخصة والمخالفات بتاعة العقار ده .. هيرد عليك رسمى بالتفاصيل بتاعة العقار .. وساعتها هتعرف ده مرخص او مخالف.


٢- اما تشتري شقه معمول لها مصالحه اتأكد من الحي (نفس المكان اللى قلت لك عليه) انه تم التصالح فيها والمخالفة اتسددت وخدت براءه ذمه عشان مش تلبس انت في الغرامه بتاعه المصالحه وقيمة الاعمال بعد كده .. لان المخالفة مش شخصية للى بنى .. لا دى بتيجى على الشقة ايآ كان مين فيها وحائزها.


٣- صحه التوقيع أو حصه فى الأرض مش معناها انها برخصه أو مصالحه عشان ناس كتير بتخلط الامور وبتسمى الحاجة دى بدون مسمياتها الطبيعية . وهوضح ده بالتفصيل 

* صحة التوقيع ده اجراء بيتخذه المشترى فى المحكمة بيثبت فيه ان اللى باع له هو اللى موقع على العقد ..لكن العقد مكتوب فيه ايه وبيقول ايه من بنود ومدى صحتها من عدمه المحكمة مبتبصش فيه بتصدق بس على توقيع البائع دون موضوع وبنود العقد.


* حصة فى الارض لو مكتوبه فى العقد يبقى بنفس المقدار للحصة المذكورة فى تسلسل الملكية لمستندات البيع اللى قبل العقد بتاعك .. وحصة الارض ملهاش علاقة بالرخصة او بالمصالحة.

٤- مش معنى ان الشقة داخلها مرافق (غاز/ كهرباء/ مياه) تبقى تم التصالح فيها أو مترخصه عشان الناس فهمه المعلومه دي غلط .


٥-اما تشتري شقه قبل ما تروح تتفرج الأول ..اسأل عن البيانات كلها .. واتأكد انك بتاخد المعلومة من مصدرها (صاحب الشقة نفسه او وكيلآ عنه) وبعدها قيم السعر وروح شوفها .. ولو عجبتك اطلع على الاوراق بنفسك او بالمحامى اللى وخده معاك او اطلب نسخه من الورق واسأل في المحكمه (عن صحة التوقيع/ صحة ونفاذ العقد) وروح الحي عشان تعرف ترخيصها ومخالفات المبنى ايه وهتعرف المخالفات اتسددت ولا معلقة هناك .. ولو كله تمام برضه روح الكهرباء والغاز والي يقولك خد نسخه وقت كتابه العقد ارفض وقول له ادينى نسخة واكتب عليها غير قابلة للتصرف او التداول.


* اوعي تشتري شقه بعقود عرفيه مش متاخد عليها (اى اجراء او تصرف او توثيق رسمى) زى صحه توقيع/ صحة ونفاذ/ مسجلة شهر عقارى او موثقة ومختومه ولما تيجى تشترى اطلب من البائع انه يعمل لك توكيل خاص (مخصص للشقة) عشان تقوم مقام البائع تجاه اى جهة رسمية لانك مش هتعرف تلاقيه وتجيبه فى اى وقت امام اى جهة رسمية بعد البيع وقبض الثمن.


٦- اتأكد من تسلسل الملكيه انه صحيح .. من اول ورق بيع وتخصيص قطعة الأرض للبناء والمشاركه وانها مسجلة شهر عقارى .. ثم الترخيص بالبناء وصلاحيته .. ثم العقود التى تليه حتى عقد البائع اللى بيبيع به + توكيلات اللى اشترى منهم لازم تكون مسلسلة ومتاحة .. واتاكد من صحة صدورها للاشخاص دى فى حالة انهم ورثة يبقى لازم تطلع على الاعلام الشرعى للوراثة وتتاكد من شهادات الوفاه ومن يحق له التصرف من الورثة .


٧- اسال كويس علي أسعار المنطقه مره وعشره عشان ناس بتبالغ في الأسعار وأهم حاجه تسأل علي سمعه إلى هيبعلك وتسأل جيرانه عن اني الشقه فعلا متملكها .. لانه ممكن يكون خاضع للحراسة ومش من حقه التصرف فى املاكه .. او عليه احكام واجبة النفاذ او واخد قروض او مديون للغير .


٨- اما تشتري شقه من واحد متزوج اطلب ان زوجته تمضي على العقد كشاهده عشان ممكن تتطالب بالشقه لو هو مطلقها او بيبيعها من وراها لان الشقه هتكون من حق الزوجه كمسكن للزوجيه.


٩- اطلب من البائع انه يوريك اخر فواتير سداد المرافق للشقة (ويفضل تكون باسمه) وروح اسال كويس جدا في شركات الكهربا والغاز عن أنه دافع آخر فاتوره عشان مش تلبس في المتاخر.


١٠- بعد تطبيق قانون التصالح مؤكد المعروض هيزيد بمخالفاته (اللى لها شرائح وهتعرف قيمة التصالح كم من الحى بعد كده) والاسعار هتنزل نتيجة المعروض فى السوق للبيع .. واعلم ان سعر الكاش غير القسط .


١١- لو اضطريت تشتري شقة معمول لها مصالحه خد في أدوار واطيه عشان متكونش قلقان من الازالة للادوار العليا بسبب التحميل الزياده على العماره فى حالة تنفيذ الازالات.


١٢- اما تتعاقد على شراء شقه وتكون ساكنة اوعي تدفع الفلوس كامله من غير ما تستلم من باب الحرص .. الطبيعى تدفع عربون بايصال مذكور فيه الثمن والباقى وتوقيت تحرير العقد النهائى المرتبط بالدفع والاستلام  فى نفس الوقت .. لتفادى اى ظروف خارجة عن ارادة البائع لو هو حسن النية او لاقدر الله اى محاولة نصب وبيعها لغيرك فى نفس الوقت لو هو سئ النية .

** انتظروا المقالة القادمة عن كيفية التعاقد وحجز وحدة فى المشروعات الجديدة

** لو محتاج تعرف اى تفاصيل اخرى ممكن تتواصل بنا على اى من الارقام التالية للتعرف على المزيد ضمن الاستشارات العقارية / القانونية (المجانية) اللى بتقدمها لك/المؤسسة  الدولية للتسويق والاستشارات العقارية

00201141046020 / 00201000173732 / 00201225523441

الأحد، 1 ديسمبر 2019

لو بتأجر/ بتشترى عقار .. ازاى تعرف تقييم سعره ؟

العقار سلعة زى اى منتج بنستخدمه له صلاحية ومواصفات وبيانات بتحدد قيمته
ولو بتفكر تشترى / تستأجر عقار .. يبقى لازم تتعرف على معايير تقييم سعره/ القيمة السوقيه للعقار ده قبل ما تفكر تشترى او تأجر ..
* هنا بنوضح انك لازم تطبق معايير التقييم الصحيحة للعقار عشان تعرف قيمته السوقيه الحقيقية .. 

زى :-
* سنة المبانى/ نوع المبنى/ اى منطقة/ اطلالته/ شارع رئيسى - جانبى/ الفيو بتاعه/ الدور/ عدد الوحدات بالدور/ مساحته/ تقسيمته/ تشطيبه/ جودة المرافق الخاصه به زى (الجراج/ الانتركم/ الدشات/ التليفونات/ الانترنت/ العدادات للكهرباء - المياه - الغاز / الحراسة - الامن - البواب)
* الخدمات المتاحة بالجوار/ مدى قربه - بعده من عملك - مدارس الاولاد / الجامعة - اهلك - نادى - مستشفى - صيدلية - سوق تجارى .. الخ ..
* وفى النهاية المقارنة الواقعية لمستويات الاسعار للعقارات المحيطة بك فى المكان ده = كم ؟

** دى كلها معايير التقييم للعقار لان كل عنصر = قيمة إما مادية - معنوية بالنسبة لك تستطيع من خلاله اما تستفيد / تفقد فيه (( وقتك/ مجهودك/ فلوسك )) .. عشان كده لازم توازن بين كل المعايير دى وتشوف المناسب لك من مواصفات اساسية تقدر من خلالها تحصل على اكبر نسبة استفادة من حصولك على العقار المطلوب بسعر وآلية سداد مناسبة لك

** عشان كده الدولية للتسويق والاستشارات العقارية من اهم الجهات التى تقدم خبراتها فى خدمة التقييم العقارى بشكل مجانى لعملاءها .. مع المزيد من الاستشارات عن افكار الاستثمار الحقيقى فى العقار .. وذلك ضمن الخدمات العقارية المتكاملة التى تقدمها الشركة باعتبارها احد كيانات نادى عقارات اليوم الذى اعطى قيمة حقيقية للسوق العقارى المصرى والعربى.
لمزيد من المعلومات والاستفسارت يرجى لتواصل بنا على اى من الارقام التالية
00201141046020 / 00201000173732 / 00201225523441
او مراسلتنا على البريد الاليكترونى/ reclubtoday@gmail.com
او متابعة صفحتنا الرسمية على الفيس بوك 
https://www.facebook.com/reclubtoday/
او مشاهدة قناتنا على اليوتيوب https://www.youtube.com/user/reclubtoday/videos?view_as=subscriber